Полюбовница

Дэсерт з’яўляецца абавязковай састаўляючай любога святочнага стала. Праўда, у навагоднюю ноч не заўсёды да яго даходзіць чарга, але гэта зусім не значыць, што з навагодняга меню можна выкрасліць апетытныя ласункі. Нават калі ў цябе і тваіх гасцей не хопіць сіл пацешыць сябе дэсертам падчас асноўнага застолля, ён даставіць масу радасці на сняданак у першы дзень новага года. Тваёй увазе некалькі арыгінальных і нескладаных рэцэптаў дэсерту.

Дэсерт з апельсінаў з ромам

Нам спатрэбіцца: На 5 апельсінаў — 100 г цукровай пудры, па 50 г вады і рому.

Апельсіны абіраем, здымаем белыя валокны, вострым нажом наразаем на тонкія скрылікі. Кладзём іх у салатніцу, пасыпаем цукровай пудрай і паліваем сумессю вады з ромам.

Гэты дэсерт трэба прыгатаваць загадзя і даць яму пастаяць паўтары-дзве гадзіны ў халаднаватым месцы. Ён будзе ідэальным пачастункам раніцай пасля навагодняга застолля.

Суфле

Нам спатрэбіцца:

• 4 апельсіны,
• 40 г мукі,
• 30 г сметанковага масла,
• шклянка малака,
• 5 яек,
• 50 г цукровай пудры.

Разводзім муку ў малацэ (50 г), уліваем сумесь у астатняе малако, добра нагрэтае; ставім на агонь, пакуль не загусне. Потым здымаем з пліты, дадаём сметанковае масла, 5 яечных жаўткоў, цэдру, надзёртую з двух апельсінаў і 5 бялкоў, узбітых у крутую пену. Выкладваем у форму, змазаную маслам, і запякаем у духоўцы на сярэднім агні.

Падаем на блюдзе, упрыгожыўшы суфле колцамі апельсінаў і пасыпаўшы цукровай пудрай.

Лімонныя квадрацікі

Нам спатрэбіцца:

• 5 яек,
• 3 шклянкі мукі,
• 1,5 шклянкі цукра,
• лімонная цэдра.

Яйкі змешваем з цукрам і расціраем 15-20 хвілін. Потым дадаём надзёртую на тарцы цэдру аднаго-двух лімонаў і муку. Замешваем некрутое цеста, раскачваем у пласт таўшчынёй у сантыметр і наразаем на невялікія квадрацікі. Выпякаем пры тэмпературы 180°С на змазанай маслам блясе.

Навагодні торт

Нам спатрэбіцца:

— Для цеста:

• 12 сталовых лыжак мукі,
• 1 шклянка смятаны,
• 1 шклянка цукровага пяску,
• 2 яйкі,
• 1 сталовая лыжка топленага масла,
• 10 грэцкіх арэхаў,
• ¼ чайнай лыжкі соды і солі,
• ванілін.

— Для крэма:

• 1,5 шклянкі цукру,
• 100 г масла,
• 2 яйкі, ванілін.

— Для сіропа:

• ½ шклянкі рому альбо лікёру.

— Для ўпрыгожвання:

• арэхі,
• апельсін,
• шакалад.

Старанна расціраем у місцы смятану і цукровы пясок, яечныя жаўткі, соду і соль, дадаём здробненыя грэцкія арэхі, топленае масла, ванілін і муку, замешваем цеста.

Выкладваем у падагрэтую, папярэдне змазаную маслам форму і выпякаем 30-40 хвілін пры тэмпературы 180°С.

Тым часам гатуем крэм: добра расціраем тонкую шклянку цукру, масла і яечныя жаўткі; бялкі ўзбіваем у моцную пену, дадаючы паступова 2-3 чайныя лыжкі цукру і ваніліну, пакрысе ўціраем узбітыя бялкі ў масляную масу.

Торт разразаем уздоўж папалам, ніжні слой прамочваем сіропам і прамазваем паловай крэму. Астатні крэм выкладваем на верх торта, упрыгожваючы яго арэхамі, скрылікамі апельсіна, можна пасыпаць надзёртым шакаладам.

А можна з нагоды Новага года ўставіць у торт навагоднія свечкі і, падаючы на святочны стол, запаліць іх. Твой торт надоўга запомніцца гасцям!