Восень — час паспрабаваць новыя маскі


Восень - час паспрабаваць новыя маскі
Восень — гэта той час, калі замірае прырода і на душы становіцца сумна. У кожнай жанчыны ёсць свае рэцэпты, як перажыць гэты няпросты перыяд. Дарэчы, восень — самы падыходзячы момант, калі можна зрабіць сабе новую прычоску, пафарбаваць валасы у колер кляновага ліста, паспрабаваць новыя маскі.
 

Правілы нанясення масак

  • Маскі наносяць на ачышчаную скуру твару ватным тампонам, мяккім пэндзлікам альбо пальцамі па масажных лініях.
  • Каб маска залішне не сцягвала скуру і прынесла карысць, а не шкоду, наносяць яе на расслаблены твар. На час уздзеяння маскі лепш прылегчы.
  • На ніжнія і верхнія павекі добра пакласці тампоны, змочаныя ў гарбаце альбо настоі пялёсткаў васілька (1 чайную лыжку здробненых пялёсткаў заліць шклянкай кіпню, настояць 20 хвілін і працадзіць), альбо нанесці тонкім слоем крэм, акуратна ўбіваючы яго кончыкамі пальцаў.
  • Здымай маску змочаным у цёплай вадзе ватным тампонам (сурвэткай), не націскаючы на скуру і не расцягваючы яе.
  • Калі ў цябе сухая скура, пасля маскі абавязкова змаж яе пажыўным крэмам.

Маскі для сухой і нармальнай скуры

Танізуючая маска

Чайную лыжку любога вітамінізаванага крэму разатры з чайнай лыжкай маянэзу і паступова дабаў чайную лыжку моцнай гарбаты. Маску нанясі вільготным тампонам, змочаным у малацэ. Праз пяць хвілін нанясі яшчэ адзін слой маскі. Праз 20 хвілін знімі маску тампонам, таксама змочаным у малацэ.

Жаўтковая маска

Разатры жаўток і дабаў да яго чайную лыжку цёплага аліўкавага альбо іншага алею і некалькі кропель лімоннага соку. У ваду, прызначаную для апалосквання твару, дабаў некапькі кропель лімоннага соку альбо касметычнага воцату.

Геркулесавая маска

Дзве сталовыя лыжкі геркулесу залі шклянкай гарачага малака, дай шматкам разбухнуць, а потым давядзі да кіпення. Ахалоджаную маску нанясі на твар, а праз 20 хвілін змый цёплай вадой.

Маска з сухога малака

Дзве сталовыя лыжкі сухога малака разатры з 1-2 чайнымі лыжкамі цёплай вады. Кашыцу нанясі на твар. Праз 20 хвілін змый цёплай кіпячонай вадой.

Мядовыя маскі

Першы варыянт
Узбі ў пену адзін яечны бялок, дабаў 100 г ячменнай мукі, 40 г мёду. Усё старанна перамяшай, нанясі маску на 10—15 хвілін, змый яе крыху цёплай, а потым халаднаватай вадой.

Другі варыянт
Дзве сталовыя лыжкі пшанічнай мукі змяшай з узбітым бялком аднаго яйка і дабаў чайную лыжку мёду. Атрыманую цестападобную масу нанясі на ачышчаную скуру твару. Праз 10—15 хвілін змый маску халаднаватай вадой.

Травяная маска

Вазьмі ў роўных частках засушаны ліпавы цвет, лісце мяты перачнай, кветкі рамонку, пялёсткі шыпшыны альбо ружы. Залі кіпнем у суадносінах 1:2 і пракіпяці на працягу 2-3 хвілін. Змачы ў цёплым адвары марлю, пакладзі яе на твар. Праз 15—20 хвілін змый маску цёплай вадой.

Маскі для нармальнай і тлустай скуры

Парафінавая маска

50—100 г парафіну расплаў на вадзяной лазні і нанясі пэндзлікам некалькі слаёў на выцертую насуха скуру акрамя вачэй. Пакінь маску да таго часу, пакуль парафін не зацвярдзее. Праз 10 хвілін здымі маску (як пальчатку), а твар пратры танізуючым ласьёнам.

Маркоўная маска

Надзяры на дробнай тарцы моркву, змяшай з узбітым яечным жаўтком, дабаў чайную лыжку сухога малака альбо крухмалу. Нанясі маску на твар і праз 20 хвілін змый яе цёплай вадой.

Дражджавая маска

20 г дражджэй змяшай з чайнай лыжкай лімоннага соку альбо соку іншых кіслых ягад і садавіны. Маску нанясі на твар і праз 15 хвілін змый цёплай вадой.

Асвяжаючая маска

Змяшай сок з садавіны альбо агародніны з дзіцячай прысыпкай да гушчыні смятаны. Нанясі яе на твар у два прыёмы і праз 20 хвілін змый спачатку цёплай, а потым халоднай вадой.

Танізуючая маска

Маска сцягвае пашыраныя поры

Узбіты яечны бялок змяшай з некалькімі кроплямі лімоннага соку і здробненым геркулесам так, каб маска мела гушчыню смятаны. Маску нанясі на 20 хвілін і змый вадой з заваркай гарбаты альбо лімонным сокам.

Універсальныя маскі

Маска з дражджэй і хрэну

Сталовую лыжку дражджэй развядзі чайнай лыжкай цёплага малака, дабаў сталовую лыжку надзёртага хрэну і добра перамяшай. Нанясі на твар і праз 15 хвілін змый вадой пакаёвай тэмпературы.

Травяная маска

Адну-дзве сталовыя лыжкі сумесі высушаных пялёсткаў півоні альбо ружы, лісця крапівы, рамонку і мяты залі цёплай вадой да атрымання густой масы. Прагрэй 7—10 хвілін на вадзяной лазні і нанясі на твар і шыю на 30 хвілін. Знімі маску ватным тампонам і старанна апаласні твар цёплай вадой.

Масляная маска

Гэтая маска вельмі карысная для вялай скуры твару і шыі.

Змяшай 50 г адтопленага сметанковага масла, 3 чайныя лыжкі алею, 2 жаўткі, палову чайнай лыжкі гліцэрыны, чвэрць шклянкі настою рамонку і 30 г камфарнага спірту. Пры гэтым жаўткі і адтопленае масла старанна разатры, а потым дабаў невялікімі порцыямі алей і гліцэрыну. Працягваючы расціраць сумесь, па кроплях улі настой рамонку і спірт. Маску нанясі на твар і шыю на 20 хвілін, а потым акуратна знімі ватным тампонам, папярэдне змочаным у цёплай вадзе.

 

Больше интересного

...

Поделиться мнением