Вызнач свой колеравы тып


Вызнач свой колеравы тып Не сакрэт, што адна і тая ж сукенка адну ўпрыгожвае, а другой зусім не падыходзіць. Ніхто нават не задумваўся, што віною таму — колер. Існуе пэўная залежнасць між колерам вачэй, валасоў, скурай чалавека і яго любімым колерам. Любімыя колеры вызначаюцца не простай выпадковасцю, а закладзены ў чалавеку ад прыроды. Усе людзі падзяляюцца на чатыры групы каляровых тыпаў, умоўна названыя па порах года — з аднаго боку «Вясна» і «Восень» (цёплыя тоны), з другога — «Лета» і «Зіма» (халодныя тоны). Калі ты зацікавілася гэтай тэорыяй, то паспрабуй вызначыць свой колеравы тып.

Як вызначыць колеравы тып?

1. Запрасі сябровак. Так будзе цікавей, а вынік больш правільным, бо з боку лепш бачна.

2. Сядзь перад вялікім люстэркам. Асвятленне павінна быць не вельмі яркім, але дастаткова моцным, каб колеры выглядалі натуральна.

3. Калі твае валасы падфарбаваныя, павяжы іх белай хусткай, інакш вынік можа быць няправільным.

4. Здымі з твару ўсю дэкаратыўную касметыку.

5. Угледзься ў свае адлюстраванне.

6. Па чарзе прыхіляй да сябе хусткі персікавага і ружовага колераў. Ад таго, з якім колерам твой твар выглядае лепш, залежыць, належыш ты да групы цёплых, персікавых тонаў («Вясна» і «Восень«) або да групы халодных, ружовых тонаў («Зіма» і «Лета»).

7. Калі ты аднесла сябе да групы халодных тонаў, вазьмі хусткі або адрэзы тканіны наступных колераў: ярка-ружовы, чорны і ярка-жоўты («Зіма»); спакойны ружовы, бардо і блакітна-стальны («Лета»). А калі да групы цёплых — травяніста-зялёны, лімонна-жоўты, ярка-сіні («Вясна»), аліўкавы, жоўта-вохраны і глыбокі сіне-зялёны («Восень»).

8. Прыкладвай да сябе узоры шасці колераў сваей групы (цёплай альбо халоднай). Паглядзі, з якім з трох твой твар выглядае больш выйгрышна.

Вось ты і вызначыла свой колеравы тып: «Зіма» або «Лета», «Вясна» або «Восень». Не засмучайся, калі табе давядзецца адмовіцца ад якога-небудзь колеру. У багатай гаме адценняў ты абавязкова знойдзеш той, які табе прыйдзецца даспадобы. Напрыклад, ты — «Вясна» і шукаеш нешта ў чырвоных танах. Табе падыдуць: макавы і аранжава-чырвоны.

9. Гэтыя парады тычацца як адзення, так і касметыкі. Вялікія пакупкі рэкамендуецца рабіць у тую пару года, назву якой носіць твой тып. Выбар будзе больш удачлівым, калі ты загадзя вырашыш, якога колеру павінна быць рэч. Кансультавацца лепш у прадаўца, які належыць да твайго тыпу.

І яшчэ пра ўпрыгожванні: золата лепш спалучаецца з цёплымі, персікавымі тонамі, срэбра — з халоднымі, ружовымі.

Колеры да кожнага тыпу

Жанчына-«Зіма»

Беласнежны, жоўта-бэжавы, шэра-бэжавы, светла-шэры, цёмна-шэры, антрацыт (марэнга); чорна-карычневы, чорны, бірузовы, цёмна-сіні, ярка-сіні, светла-сіні, сіне-бірузовы; халодна пастэльна-зялёны турмалін, ізумрудны; ярка-ружовы, светла і цёмна цыкламенавы; ярка-чырвоны, цёмна-чырвоны; яркі вінна-чырвоны; лімонна-жоўты, халодны светла-жоўты; ліловы, цёмна-фіялетавы.

Жанчына-«Вясна»

Колер яйкавай шкарлупкі; жоўта-бэжавы, залаціста-бэжавы; цёплы светла-руды; залаціста-карычневы, каштанавы; светла-сіні, лазурны, светлы і яркі аквамарын, пяшчотна-блакітны; травяніста-зялёны, яркі жоўта-зялёны, зялёны колеру лістоў ліпы, гарохавы, лімонна-зялёны; абрыкосавы, колеру ласасіны, персікавы, светла-апельсінавы; цёпла пастэльна-ружовы, цёплы ярка-ружовы, каралава-ружовы; макавы, аранжава-чырвоны; ясныя залатыя тоны; жоўта-залаты, сланечнік; колер сіняй фіялкі, сіне-ліловы, фіялетавы.

Жанчына-«Лета»

Колер натуральней воўны; ружова-бэжавы; светлы шэра-блакітны; какава, шэра-карычневы, бірузовы, прыглушаны цёмна-сіні, шызы, шэра-блакітны, нябёсна-блакітны, незабудкавы; пастэльна-зялёны, цёмны блакітна-зялёны, колер мяты і маладога лісця; усе пастэльныя і блакітна-ружовыя тоны, спакойна-ружовы; вішнёва-чырвоны, малінавы; бардо; пастэльна-жоўты, лімонна-жоўты; бэзавы, архідэя, мальва, прыглушана-ліловы, слівова-сіні,

Жанчына-«Восень»

Крэмава-белы; карамель, пясочны; арэхавы, кававы; махагон, шакаладны; глыбокі сіне-зялёны, колер марской хвалі, бірузовы; бутэлечны, багнавы, агатава-зялёны, хакі, аліўкавы; кетавы, ярка-абрыкосавы, тэракотавы, апельсінавы; аранжава-чырвоны, кінавар, іржы, таматны; усе адценні золата; кукурузна-жоўты, колер кавуна, гарчычны.

 

Больше интересного

...

Поделиться мнением